د سېنېټ مرستیال چئیرمین سیدال خان

کوټه (رپورټ)د سېنېټ مرستیال چئیرمین سیدال خان ویلي دي چې د پارلیمان لاجز کې د مېشتو غړو لپاره اساسي اسانتیاوې برابرول د کیپیټل ډوېلپمنټ اتهارټي (CDA) مسوولیت دی او په دې برخه کې هېڅ ډول غفلت د منلو وړ نه دی. هغه دا څرګندونې په اسلام‌آباد کې د وزیرانو انکلیو کې د CDA چئیرمین، د اسلام‌آباد د امنیتي چارواکو او لوړپوړو افسرانو سره په یوه غونډه کې وکړې، چې پکې د پارلیمان لاجز عمومي حالت، په ځانګړي ډول امنیت، صفایي او د اوبو د ایستلو نظام وڅېړل شو. هغه د سېنېټرانو له خوا د امنیتي نظام په اړه اندېښنې یادې کړې او لارښوونه یې وکړه چې د عصري اړتیاوو مطابق دې امنیتي نظام لا قوي شي او د پارلیمان غړو د خوندیتوب لپاره دې هېڅ ډول ناغېړي ونه منل شي. نوموړي د امنیتي ادارې ته امر وکړ چې د لاجز بشپړ سیکیورټي آډټ وکړي، د ښه والي لپاره بیړني اقدامات ترسره کړي او تفصیلي راپور دې وړاندې کړي. همدارنګه یې د خرابې صفایۍ او د اوبو د ایستلو خراب نظام باندې سختې اندېښنې وښودې او CDA ته یې لارښوونه وکړه چې د صفایۍ نظام ژر تر ژره ښه کړي او د اوږدمهاله ډرینج ستونزو حل لپاره عملي ګامونه واخلي. هغه وویل چې په ځانګړي ډول ښځینه سېنېټرانو هم په دې اړه جدي شکایتونه کړي دي. سیدال خان د اسلام‌آباد په مختلفو برخو کې د کچي آبادیو پر ضد عملیاتو په اړه هم اندېښنه وښوده او ټینګار یې وکړ چې دا ډول اقدامات باید په شفاف، عادلانه او انساني ډول ترسره شي او منتخب استازي باید په تصمیم نیونه کې شامل کړل شي. هغه وویل چې CDA او نور اړوند ادارې باید د پارلیمان لاجز او وفاقي پلازمینې د خدماتو ښه والي لپاره همغږي ستراتیژي خپله کړي او د پرمختګ منظم راپورونه د سېنېټ سکرتریت ته وړاندې کړي. په پای کې پرېکړه وشوه چې د پارلیمان لاجز ستونزې به په لومړیتوب حل کېږي او د پارلیمان غړو لپاره به یو خوندي، منظم او باعزته استوګنیز چاپېریال برابرول باوري کېږي، او CDA چارواکو د ستونزو د ژر حل ډاډ ورکړ.