قلعه عبدالله کې نامعلومو کسانو ډزې، د وژل شوو شمېر ۵ ته ورسېد

قلعه عبدالله (نوې ژوند ویب نیوز) په قلعه عبدالله کې د نامعلومو وسله والو کسانو د بې هدفه ډزو له امله د وژل شوو کسانو شمېر ۵ ته رسېدلی دی. د دې دردناک پېښې وروسته په سیمه کې سخت غم او غصه خپره شوې ده. د وژل شوو کسانو کورنیو او ځايي قبایلي خلکو د مړو جسدونه په سړک ایښي او د انتظامیې پر ضد یې سخت احتجاج پیل کړی دی. مظاهره کوونکو د وفاقي او صوبایي حکومت او قانون نافذوونکو ادارو پر ضد شعارونه ورکړي او د کوټه–چمن لویه لاره یې د هر ډول ترافیک لپاره تړلې ده، چې له امله یې د مسافرو، ښځو، ماشومانو او ټرانسپورټرانو ژوند سخت ستونزمن شوی دی.د مظاهره کوونکو وینا ده چې تر هغه به احتجاج او د لارې بندښت روان وي، څو چې قاتلان نه وي نیول شوي او انصاف نه وي ورکړل شوی. په سیمه کې وضعیت ډېر کړکېچن شوی دی او امنیتي ادارو د ځمکنۍ او هوایي څارنې اقدامات زیات کړي دي. انتظامیه له مظاهره کوونکو سره د مذاکراتو هڅه کوي، خو هغوی د نیولو د لیکلي حکم غوښتنه کوي. سیاسي او ټولنیزو حلقو هم د پېښې سخت غندنه کړې ده او د شفافو پلټنو غوښتنه یې کړې ده.