دکي کې د ځمکني ماین چاودنه، درې سکه وروڼه شهیدان؛ جمعیت علماء اسلام او پښتونخوا ملي عوامي ګوند د امنیتي وضعیت په اړه اندېښنه څرګنده کړه

کوټه (ویب نیوز) جمعیت علماء اسلام د کوټې ضلعې د عاملې غونډې په ترڅ کې په کوټه او بلوچستان کې د خرابېدونکي امنيتي وضعیت په اړه ژوره اندېښنه څرګنده کړې او له حکومته یې د ولس د سر او مال د ساتنې لپاره د بېړنیو او عملي اقداماتو غوښتنه کړې ده، بل لوري ته پښتونخوا ملي عوامي ګوند د دکي د لوني سیمې په کلي بختیار خان کې د ځمکني ماین د چاودنې له امله د درې سکه وروڼو پر شهادت ژوره خواشیني څرګنده کړې او د پېښې د بشپړو او بې پرې څېړنو، د شهیدانو له کورنۍ سره د مالي مرستې او د ماینونو څخه د اغېزمنو سیمو د پاکولو غوښتنه یې کړې ده. د جمعیت علماء اسلام د کوټې ضلعې د غونډې مشري ضلعي امیر مولانا عبدالرحمن رفیق وکړه، په غونډه کې د تنظیمي چارو او د تحصیلونو او یونټونو د فعالیتونو ارزونه وشوه، ګډونوالو وویل چې په کوټه کې غلا، ډاکې، لارې شوکې، د ولس پر نښه کولو او هدفي وژنو پرله‌پسې پېښو خلک له وېرې او ناامنۍ سره مخ کړي دي او حکومت او امنیتي ادارې باید د امن د ټینګښت لپاره عملي تګلاره غوره کړي، همدارنګه پرېکړه وشوه چې د تنظیمي مسؤلیتونو په ترسره کولو کې د غفلت کوونکو پر وړاندې به د اصولو له مخې اقدام کېږي او د ضلعې عمومي شورا غونډه به د اکتوبر په اتمه نېټه په جامع مطلع العلوم کې ترسره کېږي. پښتونخوا ملي عوامي ګوند په خپل بیان کې ویلي چې په بلوچستان کې د ترهګرۍ، هدفي وژنو، تښتونو او ځمکنیو ماینونو چاودنو زیاتوالي د ولس، کارګرانو، پولیسو او سیاسي فعالانو ژوند له جدي ګواښ سره مخ کړی، په ځانګړي ډول د دکي او هرنایي د کانونو کارګران له دوامدارو خطرونو سره مخ دي، حکومت باید د ماینونو څخه د اغېزمنو سیمو سمدستي پېژندنه او د روزل شوو ټیمونو له لارې د هغوی پاکول یقیني کړي، د وروستیو تاوتریخوالي پېښو بې پرې او هر اړخیزې پلټنې وکړي، مسؤل کسان او د هغوی همکاران قانون ته وسپاري او د شهیدانو کورنیو او ټپیانو ته بېړنۍ مالي او طبي مرستې برابرې کړي.