د جمعیت علما اسلام کوټې ولسوالۍ غونډه، د امنيتي وضعيت پر خرابېدو اندېښنه، له حکومت څخه د بېړنيو عملي اقداماتو غوښتنه

کوټه (يو اين اې) د جمعیت علما اسلام کوټې ولسوالۍ د ضلعي عاملې مهمه غونډه د ضلعي امیر شیخ الحدیث مولانا عبدالرحمن رفیق په مشرۍ د کوټې په اینګل روډ کې د ضلعي دفتر دننه ترسره شوه. په غونډه کې د اړوندو تحصیلونو او یونټونو تنظيمي فعالیتونه، د ګوند نظم او د مسؤلینو د کارکردګۍ په اړه تفصیلي ارزونه وشوه او بېلابېلو کمېټو خپل راپورونه وړاندې کړل. د غونډې ګډونوالو په بلوچستان، په ځانګړي ډول په کوټه کې د امنيتي وضعيت پر خرابېدو ژوره اندېښنه څرګنده کړه او ویې ویل چې په ښار کې د غلا، شوکې، لار وهلو، پر ملکي وګړو د بریدونو او هدفي وژنو پرله‌پسې پېښې د اندېښنې وړ دي او خلک د وېرې او ناامنۍ په فضا کې ژوند کولو ته اړ شوي دي. غونډې له حکومت او اړوندو امنیتي ادارو څخه غوښتنه وکړه چې د خلکو د سر او مال د ساتنې لپاره سمدستي او عملي اقدامات وکړي او د امنيت د ټینګښت لپاره دې اغېزمنه تګلاره غوره شي. غونډې پرېکړه وکړه چې د ولسوالۍ د عمومي شورا غونډه به د اکتوبر په اتمه، د پنجشنبې په ورځ، په جامع مطلع العلوم کې ترسره کېږي. په غونډه کې مولانا عبدالرحمن رفیق، مولانا خورشید احمد، مولانا مفتي محمد روزي خان، حاجي بشیر احمد کاکړ، مولانا محب الله، مولانا محمد ایوب، مولانا عبدالاحد، مولانا سعید احمد، مولانا محمد سلیمان، حافظ رشید احمد او نورو ویناوالو د ګوندي نظم، مسؤلیت‌پالنې او د مرکزي مشرتابه د لارښوونو د بشپړ عملي کولو پر اړتیا ټینګار وکړ. غونډې پرېکړه وکړه چې هغه کسان چې په تنظيمي مسؤلیتونو کې په پرله‌پسې توګه غفلت او بې‌پامي کوي، د ګوند د اصولو له مخې به ورسره چلند کېږي. همدارنګه ټولو تحصیلونو، یونټونو او مسؤلینو ته سپارښتنه وشوه چې خپلمنځي اړیکې پیاوړې کړي، تنظيمي غونډې په منظم ډول ترسره کړي، د کارکوونکو روزنې او لارښوونې ته ځانګړې پاملرنه وکړي او د ګوند فعالیتونه لا منظم او اغېزمن کړي.