کوټه (ورځپاڼه نوې ژوند) د مسلم لیګ (ن) د کوټې ښار د بېلابېلو اقلیتي سیمو سیمه ییزو چارواکو او مشرانو د پخواني وفاقي وزیر خلیل جارج په مشرۍ د بلوچستان والي جعفر خان مندوخېل سره لیدنه وکړه او په بریالۍ توګه د امریکا د سفر، په نیویارک کې د ملګرو ملتونو په مرکزي دفتر کې د ځوانانو او مصنوعي ځیرکتیا په سرمشریزه کې د ګډون او وینا له امله یې مبارکي ورکړه. والي جعفر خان مندوخېل د مبارکۍ او هرکلي لپاره د اقلیتي ټولنې له استازو مننه وکړه او ویې ویل چې د ملګرو ملتونو په مرکزي دفتر کې د ځوانانو او مصنوعي ځیرکتیا په سرمشریزه کې وینا کول د پاکستان او بلوچستان لپاره د ویاړ خبره ده. نوموړي وویل چې په نړیوالو غونډو او امریکا کې د مېشتو پاکستانیانو د خپلواکۍ ورځې په مناسبت پروګرامونو کې د پاکستان او بلوچستان استازیتوب او د خپلو ځوانانو غږ نړیوالې کچې ته رسول ورته د ویاړ ځای دی. هغه وویل چې په امریکا کې مېشت پاکستانیان له خپل هېواد او ولس سره ژوره مینه او تړاو لري او ګڼ شمېر پاکستانیان په سوداګرۍ او کاروبار کې بوخت دي چې د پاکستان د اقتصاد لپاره مهم رول لري. والي وویل چې که څه هم زموږ تعلق له بېلابېلو قومونو، مذهبونو او سیمو سره کېدای شي، خو موږ ټول پاکستانیان یو، د پاکستان د اساسي قانون له مخې ټول وګړي برابر حقوق لري او د هېواد د پرمختګ لپاره باید په یووالي، درناوي او ورورولۍ سره خپل رول ترسره کړو. صوبایي وزیر محمد خان لهړي وویل چې اقلیت او اکثریت ټول د یوه هېواد وګړي دي او عیسویان زموږ وروڼه دي، چې د پاکستان په جوړونه او پرمختګ کې یې د اقلیتي ټولنو ونډه د ستاینې وړ ده. پخواني وفاقي وزیر خلیل جارج وویل چې په نیویارک کې د ملګرو ملتونو په مرکزي دفتر کې د ځوانانو او مصنوعي ځیرکتیا په سرمشریزه کې د والي ګډون او وینا د ټولو لپاره د ویاړ او خوښۍ خبره ده. د لیدنې په پای کې د مسلم لیګ (ن) صوبایي مشرې ثناء انتظار والي جعفر خان مندوخېل ته ګلدسته ورکړه او نورو استازو ورته ګلان واچول.
