سیوي کې د بندو ښوونځیو او غیر حاضر استادانو جاج، د غفلت کوونکو تنخواوو د کټ کولو حکم

سیوي (ورځپاڼه نوې ژوند) د مرستیال کمشنر میر بهادر خان بنګلزئي په مشرۍ د ولسوالۍ د تعلیمي ګروپ کمېټې غونډه ترسره شوه، چې پکې د تعلیم محکمې اړوندو چارواکو ګډون وکړ. د غونډې پر مهال د ضلعې د بندو ښوونځیو، د استادانو د حاضرۍ، د تل لپاره د غیر حاضر استادانو او روانو او وړاندیز شوو پرمختیايي پروژو په اړه تفصیلي معلومات وړاندې شول. د ښوونځیو د اضافي خونو د جوړولو په اړه چارواکو وویل چې د ۷۰ ښوونځیو سروې بشپړه او د ۶۰ ښوونځیو تصدیق هم شوی دی. مرستیال کمشنر وویل چې د تعلیم په برخه کې هېڅ ډول غفلت نه شي زغمل کېدای او د سرکاري ښوونځیو د استادانو او نورو کارکوونکو حاضري باید په هر صورت یقیني شي. هغه د بندو ښوونځیو د فعالولو، د غیر حاضر استادانو پر ضد د اصولو له مخې کارروائۍ او د تعلیمي فعالیتونو د اغېزمنې څارنې لارښوونه وکړه. د تل لپاره د غیر حاضر استادانو د تنخواوو د کټ کولو حکمونه هم صادر شول. نوموړي ټینګار وکړ چې د ښوونځیو بنسټیزې اسانتیاوې او روانې پرمختیايي پروژې دې د ټاکلي معیار مطابق بشپړې شي.