پاکستان ۳ میلیارد ډالرو نړیوال یورو بانډونه خپاره کړل

کوټه (ویب نیوز) پاکستان په نړیوال مالي بازار کې مهم پرمختګ کړی او د ټولټال ۳ میلیارد ډالرو په ارزښت یې نړیوال یورو بانډونه خپاره کړي دي، چې د هېواد په تاریخ کې په یوه وار خپرېدونکی تر ټولو لوی نړیوال بانډ بلل کېږي. د مالیې وزارت د معلوماتو له مخې، د پنځه نیم کلن یورو بانډ له لارې ۱.۷۵ میلیارد ډالر ترلاسه شوي چې د کوپن کچه یې ۷.۵۰ سلنه ده، په داسې حال کې چې د لس کلن یورو بانډ له لارې ۱.۲۵ میلیارد ډالر ترلاسه شوي او د کوپن کچه یې ۷.۹۰ سلنه ټاکل شوې ده. د مالیې وزارت وايي، د بانډونو د اجرا په وړاندې نږدې دوه برابره غوښتنه ترلاسه شوې چې د نړیوالو پانګه‌والو له لوري د پاکستان په اړه د پام وړ لېوالتیا څرګندوي. د اعلامیې له مخې، د یورو بانډونو له اجرا سره به پاکستان ټولټال ۳ میلیارد ډالره بهرنی تمویل ترلاسه کړي چې حکومت به یې د خپلو بهرنیو مالي اړتیاوو، په ځانګړي ډول د پورونو د بېرته ورکړې لپاره وکاروي. د مالیې وزارت په وینا، پاکستان د روان کال په پیل کې هم د ۵۰۰ میلیون ډالرو یورو بانډ خپور کړی و، خو د اوسنیو ۳ میلیارد ډالرو بانډونو اجرا د هېواد په تاریخ کې په یوه وار د تر ټولو لوی نړیوال بانډ اجرا ده. وزارت د نړیوال بانډ بازار ته د پاکستان بېرته ستنېدل مهم اقتصادي پرمختګ بللی او ویلي یې دي چې د نړیوالو پانګه‌والو پراخه غوښتنه پر پاکستان د باور د بېرته راګرځېدو څرګنده نښه ده او نړیوالو پانګه بازارونو ته د هېواد لاسرسی یې لا پیاوړی کړی دی. د اعلامیې له مخې، پاکستان د لومړي ځل لپاره د نوي نړیوال منځمهاله پور نوټ پروګرام له مخې بانډ خپور کړی او د حکومت تګلاره د بهرنیو پورونو پر اغېزمن مدیریت، د اوږدمهاله تمویل پر ترلاسه کولو او د پورونو د بیا تمویل او بیا غځولو خطرونو پر کمولو متمرکزه ده.