د بې کنټروله مصنوعي ځیرکتیا د محدودولو لپاره د ګوګل نوی ډیجیټل چوکاټ

کوټه(ویب نیوز) ګوګل د انډرایډ په سیستم کې نوی امنیتي چوکاټ جوړ کړی چې له مخې به یې په راتلونکې کې خپلواک د مصنوعي ځیرکتیا ایجنټانو ته په موبایلي اپلېکېشنونو کې د بېلابېلو کارونو د ترسره کولو اجازه ورکول کېږي، خو فعالیتونه به یې په ټاکلو حدودو کې محدود وي. د دې سیستم له لارې به ګوګل ټاکلی شي چې د مصنوعي ځیرکتیا ایجنټان کومو اپلېکېشنونو او ځانګړتیاوو ته لاسرسی ولري او د کاروونکي له خوا کوم کارونه ترسره کولی شي. د ټکنالوژۍ وېبپاڼې «انډرایډ پولیس» په وینا، دا سیستم لا له وړاندې په انډرایډ کې موجود دی او د «اېګزېکیوټیو اپ فنکشنز» په نوم د اجازې له لارې کنټرولېږي، خو دا اجازه د انډرایډ په عادي تنظیماتو یا ډویلپر اپشنونو کې نه ښکاري. دغه ټکنالوژي لا د لومړنیو پړاوونو کې ده او تر اوسه عامو کاروونکو ته په بشپړه توګه نه ده وړاندې شوې.