د بلوچستان پولیس لپاره ۸۶۵ موټرسایکلونه، د ګزمې نظام به لا پیاوړی شي

کوټه (ویب نیوز) د بلوچستان د وزیراعلیٰ میر سرفراز بګټي د لیدلوري او د پولیسو د عمومي مفتش محمد طاهر د هڅو په پایله کې د بلوچستان پولیسو ته د عصري پولیسنګ نظام د پیاوړتیا لپاره په ټول ایالت کې ۸۶۵ موټرسایکلونه ورکړل شوي دي. د بلوچستان پولیسو ویاند ویلي چې د موټرسایکلونو له برابرېدو سره به په ښاري، لرې پرتو او ګڼ مېشتو سیمو کې د پولیسو ګزمه او بیړنی غبرګون لا اغېزمن شي او پولیس به په لږ وخت کې د پېښې ځای ته ورسېږي، چې له امله به د وخت او تېلو سپما هم وشي. د ترهګرۍ ضد څانګې ته ۲۹۸ او د کوټې ولسوالۍ پولیسو ته ۳۰ موټرسایکلونه ورکړل شوي دي. دغه موټرسایکلونه به د ګزمې، چټک غبرګون او د جرمي عناصرو پر ضد د اقداماتو لپاره کارول کېږي.