د ولسي ستونزو په اړه د حکومت بې پروايي د افسوس وړ ده، سید شراف آغا

کوټه(ویب نیوز) د پښتونخوا ملي عوامي ګوند د کوټې ضلعې د اجرائیوي کمېټې غونډه د ګوند د صوبايي مشر مرستیال او د کوټې ضلعې د سیکرټري سید شراف آغا په مشرۍ ترسره شوه چې پکې د تنظیمي فعالیتونو، د تحصیلي کنفرانسونو د جوړولو او د ولسي ستونزو په اړه بحث وشو. په غونډه کې پرېکړه وشوه چې د اکتوبر په میاشت کې به تحصیلي کنفرانسونه ترسره کېږي او د اکتوبر په لومړۍ نېټه به د ضلعې کمېټې په غونډه کې د دغو کنفرانسونو نېټې ټاکل کېږي. ګډونوالو د کوټې ښار د اوسېدونکو له ستونزو څخه د اندېښنې په څرګندولو سره پر اړوندو ادارو غږ وکړ چې د برېښنا غیر اعلاني لوډشیډنګ، ټیټ ولتاژ، د زیاتو بلونو، د څښاک پاکو اوبو کمښت، د ګاز نشتون، صفايي او د اوبو ایستلو ستونزې حل کړي. په غونډه کې د ټرافیک پولیسو له لوري د ښاریانو د ادعا شوو غیرضروري جرمانو، نامناسب چلند او نورو شکایتونو یادونه هم وشوه او له ټرافیک پولیسو څخه د دغو ستونزو د مخنیوي غوښتنه وشوه. د ګوند مشرانو وویل چې ولس لا له وړاندې د سختې ګرانۍ او بې روزګارۍ تر فشار لاندې دی، نو ځکه دې د سرکاري بیو عملي کېدل یقیني شي او د کم عاید لرونکو خلکو لپاره دې اغېزمنې مرستندویه لارې برابرې شي، او له دوکاندارانو او سوداګرو سره دې له غیرضروري ځورونې ډډه وشي. غونډې د کوټې ضلعې د تنظیمي فعالیتونو او له ولس سره د اړیکو د لا پیاوړتیا پر اړتیا هم ټینګار وکړ.