د سری لنکا کرکټ لوبډله د شل اوریزې لوبلړۍ لپاره پاکستان ته ورسېده

اسلام‌آباد (ویب نیوز) د سری لنکا د کرکټ لوبډلې لومړی پلاوی د پاکستان د سفر لپاره ناوخته اسلام‌آباد ته ورسېد. په ۱۳ کسیز پلاوي کې د شل اوریز سکواډ اته لوبغاړي او د لوبډلې د مدیریت پنځه غړي شامل دي، په داسې حال کې چې د سکواډ پاتې پنځه لوبغاړي به د سې شنبې په ورځ اسلام‌آباد ته ورسېږي. د پاکستان او سری لنکا ترمنځ د شل اوریزو لوبلړۍ درې واړه سیالۍ به د اکتوبر په ۹مه، ۱۱مه او ۱۳مه په راولپنډۍ کرکټ لوبغالي کې ترسره شي. سری لنکا د دغې لوبلړۍ لپاره د ۱۵ کسیز سکواډ اعلان کړی چې مشري به یې کوشال مینډس کوي. په لوبډله کې کامل مشارا، سنت جې وردھنې، لاہیرو ادارا، سهان اراچیګې، کمندو مینډس، دسن شناکا، چمندو وکرما سنګه، دونیتھ ویلالاګې، مهیش تېکشانا، وجې اکانتھ ویاساکانتھ، دشمانتا چمیرا، بینورا فرناندو، نوان توشارا او ایشان ملنګا شامل دي.