د ګورنر څوکۍ غوښتل سپکاوی دی، که غوښتنه کوم نو د وزیراعظم د څوکۍ به کوم: مولانا فضل الرحمان

کوټه (وېب نیوز) د جمعیت علمای اسلام مشر مولانا فضل الرحمان په خیبر پښتونخوا کې د ګورنر راج او بېړني حالت پلي کول بې‌دلیله بللي او ویلي یې دي چې د حکومتي اقداماتو تر شا د صوبې پر معدني زېرمو د واک ترلاسه کولو موخه ښکاري. نوموړي ویلي، د ګورنر څوکۍ غوښتل د ده سپکاوی دی او که د کوم منصب غوښتنه وکړي، نو د وزیراعظم د څوکۍ به وي. مولانا فضل الرحمان په اسلام‌آباد کې یوې خبري غونډې ته وویل، که حکومت له کوم سیاسي ګوند څخه شکایت لري، باید د پارلمان د تړلو دروازو تر شا غونډه راوبولي او غړي له ټولو اړوندو موضوعاتو خبر کړي. هغه ادعا وکړه چې د ترهګرۍ پر ضد اقدامات د صوبې پر معدني زېرمو د واک ترلاسه کولو لپاره د پلمې په توګه کارول کېږي. د نوموړي په وینا، په تېرو کلونو کې د ګڼو پوځي عملیاتو باوجود ترهګري مهار شوې نه ده؛ نو حکومت باید د خپلو اوسنیو پرېکړو موخې او تمه کېدونکې پایلې روښانه کړي. د جمعیت علمای اسلام د شورا هم د ګورنر راج او بېړني حالت پرېکړې د سیاسي ګټو لپاره زیانمنې بللې او د پارلمان د تړلې غونډې غوښتنه یې کړې ده. مولانا فضل الرحمان د ۲۰۲۴ کال د عمومي ټاکنو پایلې هم رد کړې او ټینګار یې کړی چې د هېواد د سیاسي او اساسي قانوني ستونزو حل باید د زور پر ځای د پارلماني مشورو او سیاسي خبرو اترو له لارې وموندل شي.