د امریکا او ایران په احتمالي تړون کې د چین د ضامن کېدو وړاندیز

کوټه(وېب نیوز)العربیه راپور ورکړی چې د ایران او امریکا ترمنځ د مذاکراتو په وړاندیز شوي چوکاټ کې چین د احتمالي ضامن هېواد په توګه د شاملولو وړاندیز شوی دی. په مسوده کې درېیم هېواد ته د ایران د غني شوي یورانیمو د زېرمو د لېږد، د غني کولو د کچې د کمولو او د مذاکراتو له بیا پیل څخه په اوو ورځو کې د هرمز تنګي د پرانیستلو وړاندیزونه شامل دي. په بدل کې یې امریکا د بندیزونو او محاصرې د نرمولو، په دوحه کې د مستقیمو خبرو او د تړون د څارنې لپاره د خپلواک نظام جوړولو وړاندیز کړی دی. خو تر اوسه کوم جامع تړون وروستی شوی نه دی.