په سومالیا کې د سمندري غلو ډزې، د درې پاکستانيانو په ګډون د پنځو کسانو د وژل کېدو راپور

موګادیشو(ویب نیوز) د سومالیا د پنټلنډ په سیمه کې د سمندري غلو له لوري نیول شوې اونر ۲۵ بېړۍ پر ضد د عملیاتو پر مهال د ډزو له امله د درې پاکستانيانو په ګډون د پنځو کسانو د وژل کېدو او د څو نورو د ټپي کېدو راپورونه ورکړل شوي دي. د موجودو معلوماتو له مخې، په وژل شویو پاکستانيانو کې دویم افسر کاشف عمر، درېیم انجینر محمود انصاري او رفیع الله خان شامل دي، په داسې حال کې چې یو هندي او د میانمار یو وګړی هم د وژل شویو کسانو په ډله کې ښودل شوي دي. د راپورونو له مخې، د پنټلنډ سمندري پولیسو د عملیاتو پر مهال د تېښتې په حال کې سمندري غلو پر عمله ډزې وکړې چې له امله یې د بېړۍ د سټیرنګ سیستم هم زیانمن شو او اوس د بلې بېړۍ په مرسته انتقالېږي. دغه بېړۍ د اپرېل په ۲۱مه د سومالیا له ساحل سره نږدې د سمندري غلو له خوا نیول شوې وه او ۱۷ کسیزه عمله یې لرله چې ۱۰ تنه یې پاکستانيان وو. پاکستاني چارواکو تر اوسه د ټولو مرګ ژوبلو په اړه وروستی او بشپړ رسمي تایید نه دی کړی.