د بلوچستان چیف سیکرټري شکیل قادر خان ویلي دي چې

کوټه (رپورټ) د بلوچستان چیف سیکرټري شکیل قادر خان ویلي دي چې حکومت د ځوان نسل د ناامیدۍ د لرې کولو او هغوی ته د عملي فرصتونو برابرولو لپاره جدي اقدامات کوي، او هڅه به وشي چې د وفاقي حکومت په همکارۍ د خالي کوټو پر بنسټ د سرکاري ملازمتونو ډکول باوري شي. هغه دا څرګندونې په کوټه کې د سیکرټرۍ د میاشتني کمېټې د غونډې مشري پر مهال وکړې، چې پکې د ګورننس، عامه خدمتونو او پرمختیايي پروژو مختلفې مسئلې وڅېړل شوې. چیف سیکرټري وویل چې د “ښه حکمراني روډ میپ” تر چتر لاندې د ادارو د کار ښه والي، د دفترونو د موثریت زیاتولو، او خلکو ته د بنسټیزو خدماتو په وخت رسولو ته لومړیتوب ورکړل شوی دی. هغه د عامه ستونزو ژر حل، د ساحوي څارنې پیاوړتیا، د پرمختیايي پروژو په وخت بشپړولو او د سرکاري دفترونو کې د افسرانو او عملې د حاضري ښه والي اړتیا هم یاده کړه. په غونډه کې د عامه فلاح، پرمختیايي پروژو پرمختګ، د غیر استعمال سرکاري وسایطو نیلامي، د نظام ډیجیټل کېدل، ای-فایلنګ او د ځوانانو لپاره د روزګار فرصتونو موضوعات وڅېړل شول. هغه ټولو ادارو ته امر وکړ چې خپل نظامونه ډیجیټل کړي تر څو د کاغذي کارونو کچه راکمه او موثریت زیات شي، او همدارنګه یې د شکایتونو د فوري حل لپاره د فایل ټریکنګ سیسټم او پاکستان سیټیزن پورټل لاندې پاتې قضیو د ژر حل لارښوونه وکړه. غونډې ته وویل شول چې د مانیټرنګ او ایوالوېشن برخه تر اوسه په ټول ولایت کې ۱۸۹۰ پرمختیايي پروژې کتلي دي، او ادارو ته سپارښتنه وشوه چې د پرمختیايي سکیمونو لپاره PC-1 ژر جمع کړي او له ۲۰۰۵م کال څخه زاړه سرکاري وسایط نیلام کړي. چیف سیکرټري ټینګار وکړ چې مؤثره حکمراني، شفافیت او ښه خدمات د حکومت د عامه فلاح اساسي هدفونه دي.