د شهناز بلوچ څخه د کورنۍ بېلتون، د توندلارو فعاليتونو نه د ناخبرۍ دعوه

کوټه (نوی ژوند نیوز) د تربت اوسېدونکې شهناز بلوچ له کورنۍ سره په ګډه خبري غونډه کې د هغې څخه د بېلتون اعلان کړی او ويلي يې دي چې دوی د نوموړې د ادعا شويو توندلارو فعاليتونو يا له کومې ناقانونه ډلې سره د اړيکو په اړه معلومات نه لرل. د تربت پرېس کلب په خبري غونډه کې د شهناز مور، نيکه او ماما وويل چې د هغې پلار د کوچنيوالي پر مهال وفات شوی و او نوموړې په کم عمرۍ کې عمان ته تللې وه، د واده وروسته هم هلته اوسېدله او دوه ماشومان يې پيدا شوي دي. د کورنۍ په وينا، نږدې دولس کاله يې له شهناز سره هېڅ اړيکه نه لرله او د هغې د ادعا شويو توندلارو فعاليتونو په اړه خبر نه وو. د کورنۍ غړو زياته کړه چې دوی يو سوله‌خوښ پاکستانی کورنۍ ده، د قانون او دولتي ادارو درناوی کوي او د شهناز بلوچ د شخصي کړنو مسؤليت پر کورنۍ نه شي اچول کېدای.