ايران د آبنايې هرمز په اړه د امريکايي قرارداد ملاتړو ته د سختو پايلو خبرداری ورکړ

تهران (ويب ډيسک) ايران خبرداری ورکړی چې د آبنايې هرمز په اړه د امريکايي قرارداد ملاتړ کوونکي هېوادونه به د سختو پايلو ذمه وار وي او د تل لپاره د لارې بندېدو له ګواښ سره مخ کېدای شي۔ د ايران د پارلمان غړي ابراهيم عزيزي ويلي چې هغه هېوادونه چې د امريکا د قرارداد ملاتړ کوي بايد دا خطر په غاړه وانخلي چې د هرمز لاره به ورباندې تل لپاره وتړل شي۔ ايراني دريځ له مخې د آبنايې هرمز په اړه هر ډول بهرنی فشار يا پرېکړه به له سخت غبرګون سره مخ شي او په دې کې هغه هېوادونه هم په نښه کېدای شي چې د امريکايي قرارداد ملاتړ کوي، په ځانګړي ډول بحرين۔ بل لور ته امريکا د ملګرو ملتونو امنيت شورا ته د ايران د کنټرول په اړه د يو قرارداد مسوده وړاندې کړې چې متحده عربي امارات، بحرين، کويت، سعودي عرب او قطر يې ملاتړ کوي۔ روسيې دغه امريکايي مسوده جانبداره بللې او رد کړې يې ده، ويلي يې دي چې هغه قرارداد به نه مني چې په سيمه کې د تاوتريخوالي بنسټيز عوامل، په ځانګړي ډول د امريکا او اسرائيلو کړنې له پامه غورځوي۔