نړيوال بازار کې تېل ارزانه شوي خو په پاکستان کې ګران پټرول حکومتي لوټ مار ده، حبيب باديزي

کوټه (وېب نيوز)د آل بلوچستان ټرانسپورټرز ايکشن کمېټې مشر حاجي حبيب الله خان باديزي ويلي دي چې په نړيوال بازار کې د خامو تېلو د بيې له کمېدو سره سره په پاکستان کې د پټروليم توکو بيې نه کمول د ولس سره ښکاره بې انصافي ده. هغه وويل چې د ګران سون توکو له امله ټرانسپورټران، بزګران، مزدوران او عام خلک له سختو اقتصادي ستونزو سره مخ دي، او د اړينو توکو بيې هم پرله‌پسې لوړېږي. نوموړي د ايراني پټرولو د ۳۵۰ روپيو في ليټر بيې په اړه هم اندېښنه څرګنده کړه او له حکومت څخه يې وغوښتل چې ژر تر ژره ولس ته ريليف ورکړي او د پټروليم توکو بيې راکمې کړي، ګنې احتجاجي ګامونه به پورته کړي.