کوټه ( سيد سردار محمد خوندئ )
د بلوچستان د کوټې ولسوالۍ په سورينج سيمه کې د سکرو په کان کې د يوې پېښې له امله بند پاتې شويو کان کيندونکو څخه د 15 تنو مړي را ايستل شوي دي.
چارواکي او د مزدورانو مشران وايي چې په کان کې پېښه د يوې سختې چاودنې له امله رامنځته شوې، چې له امله يې تر 30 زيات کان کيندونکي بند پاتې شوي دي.
د مزدورانو د مشرانو په وينا د چاودنې د شدت له امله د کان يوه لويه برخه نړېدلې ده. د بلوچستان د کانونو وزير مير شعيب نوشيرواني وايي چې د سکرو کان د نړېدو له پېښې سمدستي وروسته د ژغورنې عمليات پيل شوي دي.
‘په کان کې رامنځته شوې پېښه ډېره شديده وه’
سرکاري چارواکي وايي چې پېښه د کوټې ولسوالۍ د سورينج په يوه د سکرو کان کې رامنځته شوې ده. د بلوچستان د پي ډي ايم اې په وينا، د اطلاع تر لاسه کېدو سره سم يې ټيمونه د پېښې ځای ته روان کړل، چې څلور امبولانسونه هم پکې شامل دي.
يو جګپوړي سرکاري چارواکي وويل چې د کان له مالکانو سره يې خبرې کړې، چا چې ورته ويلي چې په کان کې تر 37 زيات کان کيندونکي موجود وو.
سرکاري چارواکي د چاودنې د شدت او د ژغورنې د عصري اسانتياوو د نشتوالي له امله د مړو شمېر د زياتېدو امکان رد نه کړ.
د بلوچستان د معدنياتو وزير مير شعيب نوشيرواني د دې پېښې په اړه په يوه بيان کې ويلي چې د بلوچستان د اعلی وزير مير سرفراز بګټي په هدايت د کانونو مشر انسپکټر او د پي ډي ايم اې چارواکي د پېښې ځای ته رسېدلي دي.
هغه وويل چې اړوندې ادارې په ګډه په ژغورنيزو چارو بوختې دي.
هغه وويل چې په کان کې بندو مزدورانو ته د رسېدو لپاره د هوا د ويستلو لار جوړولو او د ملبې د ليرې کولو چارې په چټکۍ سره روانې دي.
هغه وويل چې د بلوچستان حکومت د ژغورنې د عملياتو په دوامداره توګه څارنه کوي، ټولې شته سرچينې په کار اچول شوي دي.
سورينج د بلوچستان د مرکزی شارگوٹی کوټې څخه ختيځ لوري ته شاوخوا 40 کيلومتره واټن کې پروت دی. دا يوه غرنۍ سيمه ده چې په کې په زيات شمېر کې د سکرو کانونه شته.
په سورينج او شاوخوا سيمو کې په تېر کې هم د سکرو په کانونو کې پېښې رامنځته شوي دي.
د نورو عصري صنعتونو د نشتوالي له امله د سکرو کان کيندنه د بلوچستان لويه صنعت دی. د سکرو کانونه زياتره د کوټې، کچهي، هرنايي او دکي په ولسواليو کې دي، چې په مستقيم او غير مستقيم ډول زرګونه کان کيندونکي يې د روزګار وسيله ګڼي.
