د عید میلادالنبي د جلوسونو په لارو کې بدلون نه منو؛ خان محمد جتک

کوټه (ویب نیوز)د پاکستان سني تحریک مرکزي ګډ سیکرټري خان محمد جتک له رسنیو سره په خبرو کې ویلي چې د جشن عید میلادالنبي د جلوسونو په لارو کې به هېڅ ډول بدلون ونه منل شي. هغه وویل چې د میلاد شریف ټولو جلوسونو او مراسمو ته فول پروف امنیت ورکول د حکومت مسؤلیت دی او پوځ، پولیس، ضلعي انتظامیه، د اهل سنت مشران او علما باید په ګډه تګلاره جوړه او ټولو پروګرامونو ته بشپړ امنیت برابر کړي. نوموړي وویل چې په ډېرو حساسو ضلعو کې دې د پوځ او پولیسو اضافي ځواکونه وګومارل شي او د امن او نظم د ساتنې لپاره دې ټول موجود وسایل وکارول شي. د جلوسونو د ننوتلو او وتلو لارو او د میلاد د محفلونو په دروازو کې دې واک‌ترو ګېټونه ولګول شي او له بشپړې تالاشۍ وروسته دې ګډونوالو ته د داخلېدو اجازه ورکړل شي. خان محمد جتک ټینګار وکړ چې یوازې د لوړپوړو چارواکو د لیدنې پر مهال د امنیتي انتظاماتو له کتنې وروسته باید غفلت او سستي رامنځته نه شي، بلکې د جلوسونو او پروګرامونو تر پای پورې دې امنیتي پرسونل په فعال ډول خپلې دندې ترسره کړي. هغه د پاکستان سني تحریک له چارواکو، کارکوونکو او د اهل سنت له خلکو وغوښتل چې د میلاد په جلوسونو او محفلونو کې په اوداسه سره له پیله تر پایه ګډون وکړي او له حضرت محمد مصطفی صلی الله علیه وسلم سره خپله مینه او عقیدت څرګند کړي.