دکي کې د غیر معیاري او خرابو خوراکي توکو پر ضد کارروائۍ، یوه بیکري او دوه کارخانې مهر شوې

دکي (ورځپاڼه نوې ژوند) د دکي د مرستیال کمشنر فضل الرحمن کبداني په ځانګړو لارښوونو ضلعي انتظامیې د غیر صحي، غیر معیاري او د مودې تېر شوو خوراکي توکو د خرڅلاو پر ضد کارروائۍ چټکې کړې دي. د مرستیال کمشنر تحصیل تَل چوټیالي عبدالسلام شاهواني او د خوراکي توکو مفتش بخت محمد ناصر د دکي ښار له بېلابېلو بیکریو او د بیکري محصولاتو له کارخانو ناڅاپي او تفصیلي معاینه وکړه. د معاینې پر مهال په ګڼو بیکریو او کارخانو کې د صفایۍ خراب وضعیت، د حفظان الصحې د اصولو سرغړونه، د غیر معیاري خامو موادو استعمال او د مودې تېر او غیر صحي خوراکي توکو موجودیت وموندل شو، چې له امله یې یوه بیکري او دوه کارخانې مهر او پر ګڼو دوکاندارانو او د بیکریو پر مالکانو جرمانې ولګېدې. مرستیال کمشنر عبدالسلام شاهواني وویل چې خلکو ته د معیاري، خوندي او پاکو خوراکي توکو برابرول د ضلعي انتظامیې لومړنۍ دنده ده او هېڅ شخص یا کاروباري مرکز ته به د انساني روغتیا سره د لوبې کولو اجازه ورنه کړل شي. هغه خبرداری ورکړ چې د حفظان الصحې او د خوراکي خوندیتوب د قوانینو سرغړوونکو پر ضد به بې له توپیره کارروائۍ دوام ولري. د خوراکي توکو مفتش بخت محمد ناصر وویل چې د خلکو د روغتیا په ساتنه کې هېڅ ډول جوړجاړی نه شي کېدای او د غیر صحي، غیر معیاري او د مودې تېر شوو خوراکي توکو د جوړولو او خرڅلاو پر ضد به د قانون له مخې سخت اقدامات کېږي.