کوټه (ورځپاڼه نوې ژوند) د بلوچستان اسمبلۍ د صوبې د خرابېدونکي امنيتي وضعيت په اړه د عوامي نېشنل ګوند د پارلماني مشر قرارداد په ګډه منظور کړ او د ترهګرۍ د ختمولو، له ټولو سياسي ډلو او اړوندو خواوو سره د خبرو، ځوانانو ته د روزګار برابرولو او د امنيت په اړه د ان کمېره غونډې جوړولو غوښتنه يې وکړه. د اسمبلۍ غړو وويل چې د اربونو روپيو له لګولو باوجود ناامني نه ده ختمه شوې، نو د سياسي مشورې له لارې دې د ستونزې دايمي حل ولټول شي. مخالفو غړو د مستونګ د خالي کولو او د خډکوچې د باغونو د له منځه وړلو پر ځای د ترهګرو پر ضد د هدفي اقداماتو غوښتنه وکړه. اسمبلۍ د ملي اقدام پلان د اغېزمن عملي کولو او د ترهګرو او د هغوی د اسانتيا برابرونکو پر ضد د پرېکنده اقداماتو قرارداد هم منظور کړ. په غونډه کې د تېزابپاشۍ د پېښو د مخنيوي لپاره د قانون جوړونې قرارداد او يو شمېر نور قانوني مسودې هم منظورې شوې.
