سیوي کې د روغتیايي مرکزونو د فعالیت جاج، د غیر حاضر کارکوونکو پر ضد د تنخوا کټ کولو حکم

سیوي (ورځپاڼه نوې ژوند) د مرستیال کمشنر میر بهادر خان بنګلزئي په مشرۍ د ولسوالۍ روغتیا کمېټې غونډه ترسره شوه، چې پکې د روغتیا اړوند چارواکو ګډون وکړ. په غونډه کې د ضلعې د روغتونونو، بنسټیزو روغتیايي مرکزونو او کلیوالو روغتیايي مرکزونو کې د طبي اسانتیاوو، د کارکوونکو حاضري، د درملو موجودیت، صفایۍ او د روغتیايي خدمتونو د عمومي وضعیت تفصیلي جاج واخیستل شو. مرستیال کمشنر وویل چې خلکو ته پر وخت او معیاري طبي اسانتیاوې برابرول د انتظامیې او روغتیا محکمې لومړنۍ دنده ده. هغه امر وکړ چې د ټولو روغتیايي مرکزونو د ډاکټرانو، پیرامیډیکل او نورو کارکوونکو حاضري یقیني شي او ناروغانو ته دې درمل او اړینې طبي اسانتیاوې پر وخت ورکړل شي. په غونډه کې د غیر حاضر او په دندو کې د غفلت کوونکو کارکوونکو پر ضد د کارروائۍ او د تنخواوو د کټ کولو حکمونه هم صادر شول. نوموړي وویل چې د روغتیايي مرکزونو ساحوي څارنه به لا اغېزمنه کېږي او د غفلت کوونکو پر ضد به د اصولو له مخې کارروائي کېږي.