د ماشوم د زېږون پر مهال والدینو ته د شاوخوا یو نیم کروړه پاکستانۍ روپیو ورکولو اعلان

کوټه (ویب نیوز) سنګاپور د نفوس د دوامدار کمښت او د زېږون د ټیټې کچې د ستونزې د مخنیوي لپاره د نوي مالي پروګرام اعلان کړی، چې له مخې به یې په سنګاپور کې د زېږېدلي هر ماشوم والدینو ته د ماشوم تر ۱۷ کلنۍ پورې ټولټال ۵۵ زره او ۴۸ امریکایي ډالر، چې نږدې یو نیم کروړه پاکستانۍ روپۍ کېږي، مالي مرسته ورکول کېږي. د سنګاپور لومړي وزیر لارنس وونګ ویلي، د دې پروګرام موخه د زېږون د کچې د کمېدو ستونزې ته د حل لارې موندل او له کورنیو سره د ماشومانو د روزنې په برخه کې مالي مرسته کول دي. د راپور له مخې دغه مالي بسته به په پنځو پړاوونو کې ورکړل شي، چې د ماشوم له زېږون وروسته په لومړیو ۱۲ میاشتو کې ۷ زره او ۸۸۰ ډالر، په راتلونکو ۱۶ کلونو کې کلنۍ مالي مرسته، د ماشوم د ودې حساب لپاره ځانګړې پیسې او د ماشوم د ۱۷ کلنۍ پر مهال د لوړو زده کړو د لګښتونو لپاره اضافي مالي مرسته پکې شامله ده. په سنګاپور کې د هرې ښځې د ماشوم زېږولو کچه ۰.۸۷ ته راټیټه شوې، حال دا چې په نړیواله کچه د نفوس د ساتنې لپاره ۲.۱ کچه عادي بلل کېږي.