په خلجي کالونۍ کې د وسله والو غلو ډزې، امنیتي ساتونکی او ماشوم ټپیان، بریدګر وسله پرېښوده او وتښتېدل

کوټه (وېب نیوز) د کوټې د خلجي کالونۍ په سیمه کې د دولتي نجونو ښوونځي مخې ته د ورځې په رڼا کې د غلا پر مهال وسله والو غلو پر امنیتي ساتونکي ډزې وکړې، چې له امله یې هغه سخت ټپي شو. د عیني شاهدانو په وینا، درې وسله وال غله په پېښه کې ښکېل وو او د تېښتې پر مهال یې یو کوچنی ماشوم هم په موټر سایکل وواهه، چې هغه هم ټپي شو. د پېښې له رامنځته کېدو وروسته پولیس او ځایي خلک سیمې ته ورسېدل، خو بریدګر خپل یو تومانچه او موټر سایکل په ځای پرېښود او وتښتېدل. ټپي امنیتي ساتونکی او ماشوم روغتون ته لېږدول شوي، او پولیسو د پرېښودل شوې وسلې او موټر سایکل تر قبضې لاندې راوستي، د پېښې پلټنې یې پیل کړې او د بریدګرو د نیولو لپاره یې لټون روان کړی دی. د دې پېښې له امله د سیمې اوسېدونکي او د زده‌کوونکو کورنۍ سختې اندېښنې او وېره څرګندوي.