د زیارت د شهیدانو قربانۍ به بې‌ځایه نه شي، احتجاجي غورځنګ به نور هم پراخېږي پښتونخوا نېشنل عوامي ګوند

کوټه(وېب نیوز) د پښتونخوا نېشنل عوامي ګوند د اطلاعاتو مرکزي سېکرټر محمد عیسی روشان، د صوبايي دفتر سېکرټر ندا سنګر او د لورالايي ضلعي سېکرټر مصطفی کمال د کویله پهاټک پر احتجاجي پرلت د وینا پر مهال وویل چې د زیارت شهیدانو د خپلې خاورې د دفاع لپاره سترې قربانۍ ورکړې دي او د دوی وینه به هېڅکله ضایع نه شي. ویناوالو وویل، تر هغه چې د خلکو غوښتنې نه وي منل شوې، احتجاجي پرلت او ولسي غورځنګ به دوام ولري او لا به پراخ شي. هغوی د بلوچستان په بېلابېلو سیمو کې د خراب امنیتي وضعیت په اړه اندېښنه څرګنده کړه، د ترهګرو پر ضد یې د اغېزمنو اقداماتو او د خلکو د سر او مال د خونديتوب غوښتنه وکړه او له ولسه یې وغوښتل چې د شهیدانو له کورنیو سره د یووالي لپاره په احتجاجي غورځنګ کې فعاله برخه واخلي.