د هرنای د سبۍ ډویژن څخه بېلول د منلو وړ نه دي، سیاسي ګوندونو سخت احتجاج وکړ

هرنای(وېب نیوز) د هرنای ولسوالۍ د سبۍ ډویژن څخه جلا کولو او لورالایي ډویژن کې د شاملولو د وړاندیز پر ضد بېلابېلو سیاسي ګوندونو سخت غبرګون ښودلی او دا یې د ولس د هیلو، تاریخي حقایقو او اداري اړتیاوو خلاف پرېکړه بللې ده. د نېشنل ګوند، عوامي نېشنل ګوند، بلوچستان عوامي ګوند او پښتونخوا ملي عوامي ګوند مشرانو په جلا جلا بیانونو کې غوښتنه کړې چې هرنای دې د پخوا په څېر د سبۍ ډویژن برخه پاتې شي، ځکه چې د ولسوالۍ تاریخي، جغرافیایي، اداري او ټولنیزې اړیکې له سبۍ ډویژن سره تړلې دي. ویناوالو وویل، حکومت دې د ولس، قبایلي مشرانو او سیاسي ګوندونو له سلا مشورې پرته داسې پرېکړې نه کوي، ځکه دا به د خلکو اندېښنې زیاتې کړي. دوی خبرداری ورکړ چې که د ولس د غوښتنو خلاف هر ډول پرېکړه وشوه، نو پر ضد به یې پراخ او قانوني ولسي احتجاج ترسره کړي. مشرانو پر حکومت غږ وکړ چې د اداري بدلونونو پر ځای دې د امن او نظم، بې‌روزګارۍ، تعلیم، روغتیا او نورو بنسټیزو ستونزو حل ته لومړیتوب ورکړي او د هرنای د سبۍ ډویژن څخه د جلا کولو ټول وړاندیزونه دې سمدستي بېرته واخلي.