په کوټه کې امن او نظم له منځه تللی، حکومت دې د خلکو امنیت خوندي کړي پښتونخوا ملي عوامي ګوند

کوټه (وېب نیوز) د پښتونخوا ملي عوامي ګوند مشرانو ویلي، په کوټه ښار او د بلوچستان په بېلابېلو سیمو کې د امن او نظم خراب وضعیت د سختې اندېښنې وړ دی او حکومت د خلکو د امنیت او بنسټیزو اسانتیاوو په برابرولو کې پاتې راغلی دی. د ګوند صوبایي مشر عبدالقهار خان ودان او نورو مشرانو د ګوند یوې غونډې ته په وینا کې وویل چې د څښاک پاکو اوبو، برېښنا، ګاز، روغتیا، تعلیم او ښاري خدمتونو نشتوالی د خلکو ستونزې زیاتې کړې دي، او د ناامنۍ له امله ولس د ځان او مال له خونديتوب بې‌برخې شوی دی. دوی له حکومت وغوښتل چې د خلکو ستونزو ته عملي پاملرنه وکړي او د امن د ټینګښت لپاره اغېزمن ګامونه پورته کړي.