په کوټه کې د ترهګرۍ د خطر له امله ریډ زون تړل شوی، امنیتي حالت لوړ کچې ته رسول شوی

د مهمو دولتي ودانیو شاوخوا سخت امنیتي ګامونه، په ښار کې پلټنې او ناکه بندۍ زیاتې شوې
کوټه (ویب نیوز) د بلوچستان په مرکز کوټه کې د ترهګرۍ د احتمالي خطر له امله امنیتي ادارو ریډ زون تړلی او غیر معمولي امنیتي تدابیر یې نیولي دي. د سرچینو له مخې د وزیراعلیٰ هاوس، ګورنر هاوس او نورو حساسو دولتي تاسیساتو پر لور تلونکي مهم سړکونه د خنډونو او درنو موټرو په وسیله بند شوي دي. پولیسو، ایف سي او نورو قانون نافذونکو ادارو درنې قطعې په ریډ زون، مهمو دولتي ودانیو او حساسو ځایونو کې ځای پر ځای کړې دي، په داسې حال کې چې په ټول ښار کې د پولیسو له خوا پلټنې سختې شوې دي. د ښار په داخلي او خارجي لارو، مهمو سړکونو او بېلابېلو سیمو کې ناکه بندۍ لګول شوې او د موټرو او مشکوکو کسانو د تلاشي بهیر چټک شوی دی. د هر ډول بیړني حالت سره د مقابلې لپاره په دولتي روغتونونو کې بیړنی حالت نافذ شوی او ډاکټرانو، پیرا میډیکل کارکوونکو او ریسکیو ټیمونو ته د تیار پاتې کېدو لارښوونې شوې دي. انتظامیې له ښاریانو غوښتي چې له غیر ضروري تګ راتګ څخه ډډه وکړي، د پلټنو پر مهال له امنیتي ادارو سره بشپړه همکاري وکړي او د هر ډول مشکوک کس یا فعالیت په اړه ژر تر ژره چارواکو ته خبر ورکړي.