په بلوچستان کې د سولې لپاره حکومت، سیاسي ګوندونه او امنیتي ځواکونه دې یو موټی شي: میر زابد ریکي

کوټه(ویب نیوز) د جمعیت علما اسلام صوبايي مشر او د بلوچستان اسمبلۍ غړي میر زابد ریکي ویلي چې د بلوچستان د اوسنیو حالاتو یوازینۍ حللاره دا ده چې سیاسي ګوندونه، حکومت او امنیتي ځواکونه په ګډه د ترهګرۍ د له منځه وړلو لپاره هڅې وکړي، ځکه تر هغه چې ټول اړوند لوري په یوه چتر کې سره یو موټی نه شي، په صوبه کې د تلپاتې سولې ټینګول به ستونزمن وي. نوموړي د مرکزي سیکرټریټ په دفتر کې له ځوانانو څخه د یوه پلاوي سره د خبرو پر مهال وویل چې په بلوچستان کې اوس حالات ډېر ترینګلي دي او اړتیا ده چې ټول سیاسي او ټولنیز اړخونه سره یوځای شي او د ترهګرۍ مخه ونیسي. میر زابد ریکي وویل چې د پاکستان د سولې دښمنانو د یوې ځانګړې طرحې له مخې په بلوچستان کې ترهګري خپره کړې ده، موږ هره ورځ د خپلو عزیزانو مړي پورته کوو او له دې حالت څخه ستړي شوي یو. نوموړي وویل چې په بلوچستان کې امنیتي وضعیت تر دې کچې خراب شوی چې اوس قاضیان هم له ترهګرو خوندي نه دي، په داسې حال کې چې سوداګر، تجاران او په ځانګړې توګه ټرانسپورټران له سختو اندېښنو او مالي زیانونو سره مخ دي. میر زابد ریکي وویل چې اوس باید د بې ځایه نیوکو له سیاست څخه ووځو او حکومت، سیاسي ګوندونه او امنیتي ادارې باید په یوه دریځ سره متحد شي، ځکه په بلوچستان کې د سولې ټینګښت د ټولو لومړیتوب دی. هغه غوښتنه وکړه چې ټولې ستونزې دې د خبرو اترو له لارې د یوې ګډې مېز پر سر حل شي، ځکه مذاکرات د ستونزو د حل یوازینۍ او وروستۍ لاره ده، که نه وروسته به یوازې پښېماني پاتې وي.