په کوټه ښار کې امنیتي حالت لوړ، د ښار پر داخلي او خارجي لارو څارنه نوره هم سخته شوه

کوټه(ویب نیوز) د خپلواکۍ ورځې په مناسبت په کوټه ښار کې امنیتي حالت لوړ کړل شوی، د ښار پر داخلي او خارجي لارو امنیتي څارنه نوره هم سخته شوې او په بېلابېلو سیمو کې اضافي امنیتي ځواکونه ځای پر ځای شوي دي. د کوټې په بېلابېلو امام بارګاهونو، جوماتونو او مهمو دولتي ودانیو کې هم امنیتي تدابیر سخت کړل شوي دي. امنیتي چارواکي وایي چې ښار ته پر ننوتونکو او له ښار څخه پر وتونکو موټرو او کسانو سخته څارنه کېږي، په داسې حال کې چې پر مهمو لویو لارو او حساسو سیمو کې د امنیتي ځواکونو حضور هم زیات شوی دی. د سرچینو په وینا د کوټې د جوماتونو او امام بارګاهونو شاوخوا ځانګړي امنیتي تدابیر نیول شوي او د لمانځه پر مهال د امنیتي سرتېرو شمېر زیاتولو ترڅنګ پر مشکوکو کسانو او موټرو هم کلکه څارنه کېږي. د امنیتي حالت د لوړوالي له امله له ښاریانو غوښتنه شوې چې د خپل شاوخوا حالاتو ته پام وکړي او د هر ډول مشکوک فعالیت یا کس د لیدلو په صورت کې سمدستي اړوندو ادارو ته خبر ورکړي. امنیتي چارواکي وایي چې د اګست د ۱۴مې په مناسبت د امن او امان د ټینګښت او د خلکو د سر او مال د ساتنې لپاره امنیتي اقدامات لا اغېزمن کړل شوي دي.