بلوچستان نور د تجربو زغم نه لري، میر عبدالرحیم جتک

کوټه (ویب نیوز) د بلوچستان نېشنل پارټۍ مرکزي مشر او نوموتي قبایلي شخصیت میر عبدالرحیم جتک ویلي چې بلوچستان نور د سیاسي، انتظامي او اقتصادي تجربو زغم نه لري، د صوبې ولس له اوږدې مودې راهیسې له بېلابېلو ستونزو سره مخ دی، نو اوس اړتیا ده چې د ولس غږ په جدي توګه واورېدل شي او د هغوی د بنسټیزو ستونزو د هواري لپاره عملي ګامونه پورته شي. د صوبې له بېلابېلو سیمو څخه کوټې ته راغلو خبریالانو ته د ورکړل شوي مېلمستیا پر مهال په خبرو کې نوموړي وویل چې د بلوچستان ولس ته له سردار اختر جان مینګل سره د مینې سزا نه شي ورکول کېدای او د کومې سیاسي رهبرۍ چې ولس پرې باور لري، د هغې د ولسي مینډیټ او احساساتو درناوی باید وشي. میر عبدالرحیم جتک وویل چې بلوچستان یو حساس او مهم صوبه ده او د دې ځای حالات باید د نورو تجربو او غیر مؤثرو تګلارو له لارې لا پېچلي نه کړل شي، بلکې سیاسي مفاهمت، دوه اړخیز باور او د ولس ګډون باید پیاوړی شي. هغه وویل چې د بلوچستان ولس د خپلو حقونو، وسایلو، روزګار، تعلیم، روغتیا او بنسټیزو اسانتیاوو په اړه قانوني غوښتنې لري او دغه غوښتنې باید د زور یا فشار پر ځای د خبرو اترو او جمهوري طریقو له لارې حل شي. نوموړي د خبریالانو د رول ستاینه وکړه او ویې ویل چې خبریالان د ټولنې مهمه برخه ده چې د ولس او حکومتي ادارو ترمنځ د اړیکې رول ترسره کوي. هغه وویل چې په بلوچستان کې خبریالان له محدودو وسایلو سره سره په سختو حالاتو کې خپلې دندې ترسره کوي او د لرې پرتو سیمو ستونزې تر واکمنو ادارو رسوي. میر عبدالرحیم جتک د خبریالانو د حقونو، خوندیتوب او د اظهار د آزادۍ ساتنه د هر جمهوري ټولنې اساسي مسؤلیت وباله او ویې ویل چې سیمه ییزو ورځپاڼو او سیمه ییزې خبریالۍ ته د ورپېښو ستونزو هواری، د خبریالانو د اقتصادي ستونزو حل او د هغوی لپاره مسلکي خوندیتوب برابرول د وخت مهمه اړتیا ده. نوموړي وویل چې اختلاف نظر د جمهوریت ښکلا ده او د آزادې خبریالۍ له فضا پرته په ټولنه کې ریښتینې اصلاحات ممکن نه دي. هغه ټینګار وکړ چې د بلوچستان د راتلونکي پرېکړه باید د دې صوبې د ولس د غوښتنو، جمهوري اصولو او سیاسي بهیر له لارې وشي او ټول سیاسي، ټولنیز او قبایلي حلقې باید په بلوچستان کې د امن، پرمختګ، سوکالۍ او سیاسي ثبات لپاره ګډ رول ولوبوي.