د پټرولیم لېوي کې پرله‌پسې زیاتوالی پر ولس اقتصادي بار دی، سید امان شاه

کوټه (ویب نیوز) د عوام پاکستان پارټۍ بلوچستان صوبايي مشر سید امان شاه د پټرولیم لېوي د زیاتوالي او د وزیراعظم له خوا د موټرسایکل او آټو رکشا کاروونکو لپاره د اعلان شوي ریلیف په اړه سخت غبرګون ښودلی او ویلي یې دي چې حکومت ولس ته د ریلیف ورکولو پر ځای پرله‌پسې نوي ټیکسونه او لېوي لګوي، چې له امله یې له وړاندې د ګرانو بیو او اقتصادي ستونزو سره مخ ولس نور هم له ستونزو سره مخ کېږي. نوموړي وویل چې د پټرولیم مصنوعاتو د بیو د زیاتوالي اغېزې یوازې د موټرو تر مالکانو محدودې نه وي، بلکې د خوراکي توکو، ټرانسپورټ، درملو، برېښنا، تعمیراتي سامان او د ورځني استعمال د نورو توکو بیې هم ورسره لوړېږي، چې مستقیم بار یې عام ولس پر غاړه اخلي. سید امان شاه وویل چې پټرولیم لېوي د ولس لپاره په اضافي مالي بار بدله شوې ده، حکومت باید د خلکو د اخیستلو توان، عاید او د ګرانۍ اوسنی حالت په پام کې ونیسي او پر پټرولیم مصنوعاتو ټیکسونه او لېوي راکم کړي. هغه وویل چې په پاکستان کې میلیونونه کسان موټرسایکلونه او آټو رکشاګانې د روزګار او ورځني تګ راتګ لپاره کاروي، نو داسې اعلان چې عملي او سمدستي مالي ګټه ونه لري، د ولس له ستونزو سره ټوکې کولو ته ورته دی. نوموړي غوښتنه وکړه چې حکومت دې د پټرولیم مصنوعاتو په بیو کې مستقیم کمی، د پټرولیم لېوي کمول، د ټرانسپورټ کرایو ثبات او د کم عاید لرونکو طبقو لپاره مؤثر اقتصادي پیکج اعلان کړي. سید امان شاه وویل چې د حکومت لومړنی مسؤلیت ولس ته ریلیف ورکول، د روزګار فرصتونه برابرول او د ګرانۍ کنټرول دی، په داسې حال کې چې عوام پاکستان پارټي به د ولس د بنسټیزو اقتصادي حقونو، شفافې واکمنۍ او باعزته ژوند لپاره خپله مبارزه روانه ساتي.