مستونګ کردګاپ کې د کوټې ـ تفتان لویې لارې مرکزي پل په چاودنه کې ویجاړ، ټرافیک ودرېد

مستونګ(ویب نیوز) تېره شپه د مستونګ په کردګاپ سیمه کې نامعلومو وسله والو د چاودېدونکو توکو په وسیله د کوټې ـ تفتان پر لویه لار مرکزي پل په چاودنه کې ویجاړ کړی، چې له امله یې پل سخت زیانمن شوی او پر لویه لار د ټرافیکو بهیر درېدلی دی. د پېښې له امله د کوټې او تفتان ترمنځ تګ راتګ له ستونزو سره مخ شوی او د مسافر وړونکو او بار وړونکو موټرو اوږدې کتارونه جوړ شوي دي. د سرچینو په وینا، ګڼ شمېر موټرې پر لویه لار بند پاتې دي. له پېښې وروسته اړوند چارواکي او امنیتي ادارې د پېښې ځای ته رسېدلي، وضعیت یې ارزولی او د پل د بېرته رغولو او د ټرافیکو د بهیر د بحالولو لپاره یې اقدامات پیل کړي دي. د پېښې په اړه نورې پلټنې روانې دي.