کوټه کې د اوبو د اړتیا او رسولو ترمنځ لوی توپیر، ۱۶۷ د واسا ټیوب وېلونه غیر فعال دي

کوټه(ویب نیوز) د کوټې ډویژن کمشنر ذیشان لاشاري په مشرۍ په غونډه کې د ښار د اوبو رسولو، د واسا د فعالیت او مالي او اداري چارو ارزونه وشوه. د واسا ایم ډي مجیب الرحمن کاکړ په معلوماتو کې وویل چې په کوټه کې د واسا له ۵۴۴ ټیوب وېلونو څخه ۳۸۷ فعال دي، خو د مالي سرچینو د کمښت له امله ۱۶۷ ټیوب وېلونه غیر فعال پاتې دي. د ښار د اوسېدونکو د اوبو ورځنۍ اړتیا شاوخوا ۶۰ میلیونه ګیلنه ده، خو واسا اوس مهال یوازې ۳۱ میلیونه ګیلنه اوبه برابروي او پاتې اړتیا تر ډېره د شخصي ټیوب وېلونو له لارې پوره کېږي. په ښار کې شاوخوا ۹۹۸ کرنیز او نږدې ۱۴۰۰ سوداګریز ټیوب وېلونه هم شته چې ډېری شخصي سوداګریز ټیوب وېلونه غیر راجستر شوي بلل شوي دي. غونډې ته وویل شول چې د واسا له څه باندې ۹۷ زره کورنیو او سوداګریزو پېرودونکو څخه هر کال شاوخوا ۲۴۰ میلیونه روپۍ عواید ترلاسه کېږي، خو د ادارې ټول لګښتونه له ۴ اربه او ۶۴ کروړه روپیو څخه زیات دي. کمشنر د غیر فعال ټیوب وېلونو د بیا فعالولو، د اوبو د دوامدارې رسونې او د مالي ستونزو د حل لپاره د اقداماتو لارښوونه وکړه او د برېښنا د لګښتونو د کمولو لپاره یې د ټیوب وېلونو د لمریزې انرژۍ پر سیستم د انتقال جامع وړاندیزونه هم وغوښتل.