د آرچر روډ د تاریخي ګوردوارې د نړولو پر ضد د لږکیو ګډه خبري غونډه، د څېړنو غوښتنه

کوټه(ویب نیوز) د آرچر روډ د تاریخي ګوردوارې د مبینه نړولو او په ځای یې د سوداګریزو ودانیو د جوړولو پر ضد سکهـ، هندوانو، عیسویانو، بالمیک او نورو لږکیو ټولنو ګډه خبري غونډه وکړه. د سکهـ ټولنې مشر سردار اویناش سنګ وویل، دا یوازې یوه وداني نه ده، بلکې د سکهـ ټولنې مذهبي او تاریخي میراث دی چې په یوه شپه کې یې نړول د اندېښنې وړ دي. نوموړي وویل، ټولنې تل سوله‌ییزه او قانوني لار غوره کړې ده. د لږکیو مشرانو له وزیراعظم، د بلوچستان له وزیراعلیٰ او کور کمانډر څخه د پېښې د بې پرې لوړې کچې څېړنې او د ځمکې د اصلي ریکارډ د وړاندې کولو غوښتنه وکړه او ویې ویل، که تاریخي او قانوني اسناد د سکهـ ټولنې حق ثابت کړي، نو ځای دې بېرته هغوی ته وسپارل شي، تاریخي ګوردواره دې د خپلې اصلي پېژندنې سره بیا جوړه او هلته دې تعلیمي اداره هم جوړه شي.