په ټانک کې د ناپېژاندو وسله‌والو په ډزو د ټاکنو کمېسیون مشر افسر شمشاد خان شهید شو

ټانک (ویب نیوز) د خېبر پښتونخوا په ټانک ولسوالۍ کې د ناپېژاندو وسله‌والو په ډزو د ټاکنو کمېسیون د عمومي رئیس شمشاد خان د وژل کېدو خبر ورکړل شوی دی. د ټاکنو کمېسیون ویاند ویلي، نوموړی یو رښتینی، شریف او دندې ته ژمن افسر و. د کمېسیون په وینا، د شمشاد خان له چا سره شخصي دښمني نه وه او پېښه هدفي وژنه بلل شوې ده. د ټاکنو کمېشن مشر، غړو، سکرتر او کارکوونکو د نوموړي پر شهادت ژوره خواشیني څرګنده کړې، له کورنۍ سره یې خواخوږي ښودلې او غوښتنه یې کړې چې دولتي کارکوونکو ته دې د ترهګریزو پېښو پر وړاندې امنیت برابر شي.