په خېبر پښتونخوا کې د بېړني حالت پر ضد د جمعیت وکلا فورم قرارداد

کوټه (وېب نیوز) د جمعیت وکلا فورم پاکستان مرکزي مشر سناتور کامران مرتضی، سناتور مولانا عبدالواسع او سناتور مولانا عطاالحق درویش په خېبر پښتونخوا کې د بېړني حالت د نافذېدو پر ضد په سېنېټ کې قرارداد وړاندې کړی دی. په قرارداد کې له ولسمشر او وفاقي حکومت څخه د پرېکړې د بېرته اخیستو او د بېړني حالت د نافذېدو اړوند سمري، راپورونو، لاملونو او نورو اسنادو د پارلمان مخې ته د وړاندې کولو غوښتنه شوې ده. په قرارداد کې د صوبایي خپلواکۍ، د ټاکل شویو ادارو د ولسي واک، ولسواک نظام او د خلکو د اساسي حقونو پر ساتنه ټینګار شوی دی.