د بلوچستان پولیسو ګمارنې به د وړتیا له مخې وي، سفارش ته ځای نشته، ډي آی جي وزیر خان ناصر

مستونګ (وېب نیوز) ډي آی جي وزیر خان ناصر ویلي، چې د بلوچستان پولیسو ګمارنې به په بشپړ ډول د وړتیا او میرټ له مخې کېږي او سفارش ته به پکې ځای نه وي. نوموړي د مستونګ په شاهي باغ کې د پولیسو د ګمارنې د فزیکي ازموینې او منډې پر مهال وویل، چې د پولیسو یونیفورم یوازې دنده نه، بلکې عزت او دروند مسؤلیت دی. د مستونګ پولیسو د ۱۳۰ څوکیو لپاره ۳۸۵ نوماندانو په منډه کې برخه اخیستې وه، چې له ډلې یې ۲۷۰ بریالي اعلان شول. د نوماندانو لپاره لازمه وه، چې یو نیم کیلومتر واټن په اوو دقیقو کې بشپړ کړي. د ازموینې پر مهال امنیتي او طبي اسانتیاوې هم برابرې شوې وې. د چارواکو په وینا، د ګمارنې په راتلونکي پړاو کې به د نوماندانو ازموینې ترسره شي.