د مفتي محمود اصولي سیاست اوس هم د لارښوونې څراغ دی، مولانا عبدالواسع

کوټه (وېب نیوز) د جمعیت علمای اسلام بلوچستان صوبايي مشر سناتور مولانا عبدالواسع، صوبايي عمومي منشي آغا محمود شاه او د اطلاعاتو صوبايي منشي حاجي دلاور خان کاکړ ویلي، چې د مفتي محمود ژوند د اصولي سیاست، علمي بصیرت، دیني استقامت او جمهوري مبارزې روښانه باب دی. دوی وویل، چې مفتي محمود د اساسي قانون، جمهوریت او د خلکو د حقونو لپاره مبارزه کړې او سیاست یې د شخصي ګټو پر ځای پر نظریاتو او ملي موخو ولاړ و. د مشرانو په وینا، د اکتوبر پر ۱۵مه په ملتان کې د مفتي محمود کنفرانس یوازې یادغونډه نه ده، بلکې د هغه له فکر او مبارزې سره د بیا ژمنې فرصت دی. دوی د جمعیت علمای اسلام له کارکوونکو، علماوو، زده‌کوونکو او سیاسي مشرانو وغوښتل، چې په کنفرانس کې پراخ ګډون وکړي.