په خیبر پښتونخوا کې ایمرجنسي او ګورنر راج رد شول؛ پښتونخوا نیشنل عوامي ګوند او اېن ډي اېم

کوټه (وېب نیوز) پښتونخوا نیشنل عوامي ګوند او نیشنل ډیموکراټیک موومنټ په خیبر پښتونخوا کې د ایمرجنسي، ګورنر راج او د ۱۲ ضلعو لپاره د جلا اداري نظام د جوړولو اقدامات غندلي او د اساسي قانون، وفاقي جمهوریت او صوبايي خودمختارۍ خلاف یې بللي دي. د دواړو ګوندونو په ګډ بیان کې ویل شوي، چې د صوبايي حکومت د کارکردګۍ په اړه تحفظات باید د جمهوري او اساسي لارو حل شي، نه دا چې د منتخب حکومت واکونه محدود شي. دوی د پخوانیو قبایلي سیمو د خیبر پښتونخوا سره د یوځای کېدو له مخې ترلاسه شوي حقوق او قانوني تحفظات د ساتلو غوښتنه کړې ده. بیان کې ویل شوي، چې د ترهګرۍ او ناامنۍ حل یوازې غیرمعمولي اداري اقدامات نه دي؛ بلکې د امنیتي تګلارو بیاکتنه، د امن او ثبات لومړیتوب او د خلکو د ګټو ساتنه اړینه ده. دواړو ګوندونو د ایمرجنسي او ګورنر راج د پرېکړو د بیاکتنې، د ۱۲ ضلعو د اداري نظام د وضاحت او د اساسي حقونو د ساتنې غوښتنه کړې ده.