په ګوادر کې د کب نیولو کښتۍ ډوبه؛ ناخدا مړ، شپږ کب نیوونکي لادرکه

ګوادر (وېب نیوز) د پیشکان او ګنز ترمنځ په سمندر کې د کب نیولو د کښتۍ ډوبېدو له امله ناخدا لعل محمد بلوچ مړ شوی او شپږ کب نیوونکي لادرکه دي. د معلوماتو له مخې، کښتۍ د کب نیولو لپاره سمندر ته وتلې وه چې له پېښې سره مخ شوه. په کښتۍ کې سپاره اووه کسان په اوبو کې ډوب شوي وو؛ د ناخدا مړی موندل شوی، خو د پاتې شپږو کسانو لټون دوام لري. ویل کېږي، چې له لادرکه کسانو څخه درې تنه د سیند صوبې اوسېدونکي دي. ځايي سرچینې وايي، چې د پېښې له خبرولو سره سره دولتي ژغورونکې ډله تر اوسه سیمې ته نه ده رسېدلې، نو ځايي کب نیوونکو په خپله د خپلو ملګرو لټون پیل کړی دی. د لادرکه کسانو کورنۍ او ځايي خلک اندېښمن دي او د ژر تر ژره ژغورنې غوښتنه کوي.