پېښور (وېب نیوز) د خېبر پښتونخوا په مرکز پېښور کې د دیر کالونۍ په سیمه کې د یوه شخصي ښوونځي د درې پوړیزې ودانۍ د نړېدو له امله د ۳۴ ماشومانو او یوې ښځینه ښوونکې په ګډون ۳۵ کسان مړه شوي او ګڼ نور ژوبل دي. په مړو ماشومانو کې شپږ نجونې هم شاملې دي. د ژغورنې ادارې د معلوماتو له مخې، د پېښې د سهار په ۸ بجو او ۴۸ دقیقو ترلاسه شو، چې ورپسې د ژغورنې عملیات پیل شول. د روغتونونو د چارواکو په وینا، د لېډي ریډینګ روغتون ته ۳۳ او د نصیرالله بابر مېموریل روغتون ته د دوو کسانو مړي لېږدول شوي دي. دواړو روغتونونو ته په مجموعي ډول ۵۳ ټپیان هم وړل شوي چې د ځینو روغتیايي حالت نازک ښودل شوی دی. د چارواکو په وینا، تر خاورو او کنډوالو لاندې ټول کسان راایستل شوي دي. پولیسو د ښوونځي مالک نیولی او په پېښه کې یې پلټنې پیل کړې دي. د پلټنو د چارواکو په وینا، د ودانۍ په جوړولو کې د غیرمعیاري موادو د کارولو شک موجود دی. د پېښې پر مهال د ښوونځي پر چت شاوخوا له ۱۱۰ څخه تر ۱۱۵ پورې ماشومان موجود وو، خو چت د وزن زغملو توان ونه درلود او ونړېد. مرستیال کمېشنر د پېښې د لاملونو معلومولو لپاره د پلټنو کمېټه جوړه کړې، په داسې حال کې چې د پوهنې سېکرټر هم له اړوندو چارواکو څخه راپور غوښتی دی. وزیراعظم شهباز شریف د قیمتي انساني ژوندونو پر ضایع کېدو خواشیني څرګنده کړې او لارښوونه یې کړې چې ټپیانو ته دې غوره روغتیايي اسانتیاوې برابرې شي، اغېزمنو کورنیو سره دې مرسته وشي او د پېښې د مسؤلینو پر ضد دې د قانون له مخې اقدام وشي. د خېبر پښتونخوا ګورنر فیصل کریم کنډي هم د پېښې په اړه خواشیني څرګنده کړې او له اړوندو چارواکو یې راپور غوښتی دی.
