پښتونخوا ملي عوامي ګوند د اوړو د ګرانوالي پړه پر خوراک څانګه واچوله

کوټه(ویب نیوز)پښتونخوا ملي عوامي ګوند په بلوچستان کې د اوړو د بیو پر بې‌ساري لوړوالي اندېښنه ښودلې او ویلي یې دي چې د ۱۰۰ کیلو اوړو بوجۍ له ۱۵ زرو تر ۱۸ زرو روپیو پورې پلورل کېږي، په داسې حال کې چې تنوروال هم د ډوډۍ وزن کموي. د ګوند په ولایتي بیان کې ویل شوي چې په هېواد کې د غنمو او اوړو کمښت نشته، خو په بلوچستان کې د اوړو ستونزه د ناسم مدیریت او اداري فساد پایله ده. ګوند له حکومته غوښتي چې د غنمو رسد یقیني کړي، پر اوړو سبسایډي بېرته پیل کړي، د احتکار او ناجایزې ګټې اخیستنې مخه ونیسي او خلکو ته سمدستي ریلیف ورکړي. بیان زیاتوي چې یوازې خبري بیانونه او د عکسونو لپاره جوړې شوې غونډې د خلکو ستونزې نه شي حلولای؛ عملي اقدامات اړین دي.