په بلوچستان کې د اوړو بحران؛ د ۵۰ کیلو بوجۍ بیه تر اتو زرو روپیو رسېدلې

کوټه (وېب نیوز) د عوام پاکستان ګوند د بلوچستان صوبايي عمومي سېکرټر پروفېسر ډاکټر حلیم صادق د اوړو د بیو لوړوالی او کمښت اندېښمنوونکی بللی او ویلي یې دي چې په کوټه او نورو سیمو کې د ۵۰ کیلو اوړو بوجۍ بیه تر اتو زرو روپیو رسېدلې ده. نوموړي ادعا کړې چې د خوراک اداره او ضلعي انتظامیه د اغېزمنو اقداماتو پر ځای په غونډو بوخت دي او خلک د احتکارګرو رحم ته پرېښودل شوي دي. هغه د اوړو له کارخونو سره د احتمالي جوړجاړي، باج اخیستنې او په خوراک اداره کې د خپلوانو د ګومارنې د تورونو د شفافې پلټنې غوښتنه کړې ده. نوموړي له حکومته غوښتي چې په دولتي بیو د اوړو برابرول یقیني او د ناجایزه ګټې اخیستونکو پر ضد اقدام وکړي.