په هېواد کې د مشرتابه بحران دی، ولس له ټاکنیز او پارلماني نظامه ناهیلی دی، ندیم افضل چن

اسلام‌اباد (وېب نیوز) د پاکستان پیپلز ګوند مشر ندیم افضل چن ویلي، په هېواد کې د مشرتابه بحران موجود دی او ولس له ټاکنیز نظام، پارلمان او بیوروکراسۍ څخه ناهیلی شوی دی. نوموړي له سما ټلوېزیون سره په خبرو کې ویلي، د ګرانۍ لاملونه د کرنې د برخې ستونزې، د تولیدي لګښتونو زیاتوالی، د اقلیم بدلون او پر پولو د سوداګرۍ محدودیتونه دي. د هغه په وینا، ولس له دولتي نظام څخه هم ناخوښ دی او په هېواد کې د رڼو ټاکنو لپاره اغېزمنو ګامونو ته اړتیا ده. هغه زیاته کړې چې په سیاسي ګوندونو کې باید د نظر د اختلاف لپاره ځای موجود وي او غړي دې وکولای شي خپلې اندېښنې له خپلو مشرانو سره شریکې کړي. ندیم افضل چن وویل، پخوا په هېواد کې د غنمو تولید له اړتیا زیات و، خو اوس غنم واردوي.