په خیبر پښتونخوا کې د پاکستان پوځ د ځای پر ځای کولو خبرتیا خپره شوه

کوټه (وېب نیوز) د پاکستان د کورنیو چارو وفاقي وزارت په خیبر پښتونخوا کې د امن او نظم د ټینګښت، د ولسي وګړو او دولتي تاسیساتو د خوندیتوب لپاره د پاکستان پوځ د ځای پر ځای کولو رسمي خبرتیا خپره کړې ده. د خبرتیا له مخې، پوځ به د اساسي قانون د ۲۴۵مې مادې له مخې د ۲۰۲۶ کال د اکتوبر د ۱۱مې نېټې د بېړني حالت د صدارتي اعلان د مودې په اوږدو کې له ملکي ادارې سره مرسته کوي. د پوځي ځواکونو او سرچینو شمېر به د خیبر پښتونخوا ګورنر د پوځ د عمومي قوماندانۍ د پوځي عملیاتو له ریاست سره تر سلا مشورې وروسته ټاکي، او اړوند حکم به د پاکستان په رسمي جریده کې خپور شي. دا پرېکړه په صوبه کې د بېړني حالت او ګورنر راج له نافذېدو وروسته شوې ده. د وفاقي حکومت په وینا، د ترهګرۍ د پېښو زیاتوالی، د امن او نظم خراب وضعیت او د خلکو ژوند او مال ته ګواښونه د دې اقداماتو لامل شوي دي. د صوبايي چارو د سمبالولو لپاره د ګورنر په مرسته یوه ۱۱ کسیزه مشورتي شورا هم جوړه شوې، او ثناالله اېډوکېټ د صوبې اېډووکېټ جنرل ټاکل شوی دی.