د بلدیاتي ادارو غیر معاشي فنډونه بېرته فعال شول؛ لوکل فورم د وزیراعلی او مشاور مننه وکړه

ژوب (وېب نیوز) د بلوچستان لوکل فورم او ژوب استازو د بلدیاتي ادارو د غیر معاشي فنډونو د بېرته فعالولو له امله له وزیراعلی میر سرفراز بګټي او د بلدیاتو له صوبايي مشاور نوابزاده امیر حمزه بلوچ څخه مننه کړې ده. د فورم د بیان له مخې، له تېرو څلورو میاشتو راهیسې بند فنډونه بېرته فعال شوي، چې له امله یې د بلوچستان په بېلابېلو سیمو کې د بلدیاتي استازو او کارکوونکو ترمنځ خوښي خپره شوې ده. دوی ویلي، چې د فنډونو په بېرته فعالېدو سره به د بلدیاتي ادارو د کارکردګۍ او د خلکو د خدمتونو په دوام کې مرسته وشي. فورم هیله څرګنده کړې، چې وزیراعلی او د بلدیاتو مشاور به د سیمه‌ییزو ادارو د لا فعالولو لپاره خپلې هڅې جاري وساتي.