په خیبر پښتونخوا کې د بېړني حالت او ګورنر راج پر ضد پي ټي‌آی پېښور هایکورټ ته ولاړه

کوټه (وېب نيوز) پاکستان تحریک انصاف په خیبر پښتونخوا کې د بېړني حالت او ګورنر راج نافذول په پېښور هایکورټ کې ننګولي او د قضیې د بېړنۍ اورېدنې غوښتنه یې کړې ده. بېرسټر ګوهر له محکمې غوښتي چې د صوبې د منتخب حکومت د بېرته بحالولو او د اساسي قانون د واکمنۍ د ټینګښت لپاره دې موضوع ژر وڅېړل شي. د هغه په وینا، پي ټي‌آی د حکومت ټول اړوند نوټیفیکېشنونه ردوي او د دې اقدام پر ضد به خپله قانوني او اساسي مبارزه روانه ساتي. بېرسټر ګوهر په قامي اسمبلۍ کې د وینا پر مهال ګورنر راج د منتخب جمهوري حکومت د لرې کولو په معنا بللی او ویلي یې دي چې د ترهګرۍ د له منځه وړلو لپاره باید اغېزمن اقدامات وشي او په هېڅ سیمه کې ترهګرو ته پناه ورنه کړل شي. نوموړي د منع شوې ډلې بي اېل اې په اړه پر هند د ملاتړ تور هم لګولی او ویلي یې دي چې دا ډول پرېکړې د هېواد نظام له ستونزو سره مخ کوي.