په بلوچستان اسمبلۍ کې د سرداري نظام د ختمولو قرارداد جمع شو

کوټه (وېب نیوز) د جماعت اسلامي بلوچستان مشر او د صوبایي اسمبلۍ غړي د سرداري نظام د ختمولو او د ټولو وګړو د اساسي قانون او قوانینو تابع کولو په اړه قرارداد د صوبایي اسمبلۍ سیکرټري طاهر شاه کاکړ ته سپارلی دی. د جماعت اسلامي د بیان له مخې، په قرارداد کې د ټولو وګړو د مساوي حقونو، د سردارانو د دولتي سرپرستۍ د ختمولو او په ظلم او زیاتي کې د ککړو کسانو د قانوني محاکمې غوښتنه شوې ده. په قرارداد کې په خضدار کې د اسما جتک او په قلات کې د لایبې نچاري پېښو ته هم اشاره شوې. تمه ده چې قرارداد به په راتلونکې غونډه کې اسمبلۍ ته وړاندې شي.